الماركات ...

السلام عليكم ورحمة الله وبركاته

 فتحت الموضوع بعد سالفة انه "هل المهم الملابس تكون على ذوقي او المهم ماركتها مشهوره" طبعا ماركه تعني اسم الشركه الي تصنع الملابس،، ومصانع الملابس منتشره على مستوى العالم وتوصلنا من بلدان يمكن ماتخطر لنا على بال،، المهم،، برائيي الماركه المشهوره ما تنفي كون الملابس حلوه او لا وبالنسبه لي افضل الماركات المشهوره لاني اعرف ان شهرتها في محلها لانها اكتسبت شهرتها من رضى الزبائن وبعضها اسمها بنته على مر عقود من الابداع والجوده، إما على مستوى الخامات او على مستوى الالوان والتصاميم ،، و بعض الماركات فعلا جودة الخامات ماتكون توب لكن الوانها وتصاميمها جدا جميله،، في العاده الشركات الي ماركتها مو مشهوره تكون الوانهم مره مو تمام او التصميم لازم فيه عله إما القصه غير متقنه او الازرار او السسته تكون من الاكسسوارات الي :/ ،، النقطه الثانيه الماركات تطلع وتشتهر على قد خدمتها واهتمامها بارضاء المشتري في ادق التفاصيل حتى في موقع محلاتهم واستبدال وارجاع البضاعه وحماية الزبون عن طريق خدمات ما بعد البيع ،، لكن المهم ايش؟! اننا نبني خبرتنا الخاصه ، مين افضل بالخامات ومين افضل بالسعر ومين افضل بالالوان والاستايل فنسير من الزبائن الخبيرين بالموضه والازياء فنعرف ايش الخامات التمام وايش هي التصاميم والالوان الرائجه بوقتنا وبكذا ممكن ندعم شركات ناشئه من الممكن انها تسير مشهوره مستقبلا،، وكمان لأن مناسبتنا مو وحده يعني في مناسبات رسميه زي الاعياد تدفعي فيها،، ومناسبات بسيطه عزومة عصريه او للخرجات،، وحاجه كمان انه قدرتنا الماديه مو وحده،، وصح اننا ممكن نطلع قطع حلوه من ماركات عاديه لكن لازم تكون عندنا الخبره في اننا نفرق ايش الي يبان عليه القيمه" وايش الي "مشي حالك"

كيف تعرفين الالوان اذا كانت درجة اللون صحيحه او لا ؟؟

ببساطه من عروض الازياء لكل موسم بينزلوا الالوان الجديده والرائجه لهذي السنه ومنها حتعرفي اذا الماركه الي تشتري منها تعرض الالوان بالدرجات المطلوبه ولا لا

والقصد مو انه مثلا نزل اللون الاصفر في عروض الازياء هذا يعني انه المهم يكون اصفر

لا،، الاصفر درجات كثيررررره وممكن يجيك مائل على كذا لون فلازم نعرف ايش هي درجات الالوان المقصوده فعلا

كمان تعرفي نقشات الاقمشه وخاماتها من عروض الازياء كمان واستايل القصات الجديده وطريقة التفصيل

طيب ليه بس امشي على عروض الازياء ليه مايكون لي رائي وذوقي الخاص

عروض الازياء تطلع لنا نماذج لاقمشه جديده زمان ما كانت متوفره مثلا زي اقمشة الجنزات الحاليه تطورت واختلفت تماما عن الاقمشه زمان الي كانت صناعتها رديئه

فصناعة الاقمشه قاعدة تتطور زيها زي اي صناعه ثانيه

وكمان الالوان نفس الحكايه قاعدين يطورونها ويطلعوا درجات اجمل من الي كنا نعرفها زمان
وحتى طريقة التفصيل فالماركات المشهوره لما تلبسي منها بلوزه بيضاء تطلع عالجسم احلى من اي ماركه عاديه لان تفصيلها يبين جاذبية الجسم مع انك ممكن ما تلاحظي الفرق في خامة القماش او اللون.

طيب غالبيتها يا اما تصنع في الصين او الهند!

صحيح لكن الشركه تصنع هناك عشان حاجتين اليد العامله والمواد الخام ارخص . طيب ليه تكون ارخص؟ لانه لما يفتحوا مصنع مثلا باوربا حيكون بناء مصنع واستيراد المواد الخام مكلف جدا لهم وبالنهايه يطلع نفس المنتج

وغير كذا الشركه نفسها هي الي تحدد كل شيء التصميم خامات الاقمشه والالوان والجوده فاذا سار اي قصور فهو مو من موقع المصنع لكن من الشركة نفسها فإذا قللت جودتها هذا الشيء حيأثر في مبيعاتها،، وطبعا هالشيء يعتبر مشكلة الشركة نفسها.

وقلت بداية الماركات المشهوره ما تنفي كون الملابس حلوه او لا، لأن صناعة الملابس تجاره ممكن تتعرض للخسارة وممكن الماركة تقلل من جودتها حتى تغطي خسايرها،، لكن طبعا في ماركات تعتبر راسخه في صناعة الملابس، ولما يكون الزبون خبير اسم الماركه حيكون محل جذب له لكنه حيعرف اذا الماركه خفضت جودتها ان الماركة ويبداء يدور في البديل من الماركات الي ممكن حسنت من جودتها لتحقيقها ارباح او غيره.

وبالنهاية تحياتي وامنياتي بجولة مول سعيده :)